Continental big boss dem, Enyimba FC don Comot clear Nasarawa United doubt for dia own house, as dem collect solid tiri points for dia hand korokoro .
Solid Miners pikins dem wai comot before de match wit plenti plenti gingering say e sure for dem die, say de tiri points na dia own , no bodi fit to drag wit them for diz one.
Ah! 90 minutes come finally finish dia bragado as levels pass levels , even doe dem try dia best for de game but ticket still cut as match end 1-2 as Enyimba collect dia first away tiri ponkwe for lafia dere.
Make we no forget say Nasawara united senior Coachy, coach Bala Nikyu bin fire talk before dem play de match say, ” Enyimba no bi Arsenal or Manchester United wai go de fear fear dem “.
Enyimba coachy, Coach Fatai Osho wit 10 elephant boys Laslas finish work for coach Bala mata, as Enyimba show dem say dem no bi dia mate as dem genge pose like Barcelona and Real Madrid Waka Comot Lafia as king of de East wai dem bi.