De new senior Coachito of MFM FC Coach Gabriel Lekan, wai take over afta coach Bolus talk say en no do again and de management don come finally confirm mattaz as dem don declare Coach Gabriel as de new MFM FC head coach. En don come out talk say en happy for de 2-0 winning wai dem grab diz time around for dia home against Adamawa United afta dem don suffer well well for sometime to even take eye see tiri points.
As belle de sweet Coachy pass Freshyo youghurt wai cold well well, Naso e yarn tori pipu say en thank baba God say en boys hear all en word and instructions wai en tell dem to follow before de match.
Coachy say as en boys open dia ears con listen to am well, na watin con helep dem fit score plenty goals for first haf of de game, Sote en de expect say dem go score more goals for second haf but de tin no con pure like first haf own, but no lele en still get joy for de tiri goals dem waya Adamawa United.
As de yarnings con enta en bodi naso Coach Gabriel go spiritual as him be coach of God, wen tori pipu ask am say weda en dey comfortable witi de outing of en boys, baba come smile ansa say ” De outing de ok by God, na Baba God giv us diz tiri ponkwe wai we grab sure sure “. Coachy strong face stamp talk.
Coach Gabriel still con enta higher realm of de spirit say en get assurance say baba God go helep am achieve more success home and away witi de team as him close matta witi tori pipu for stadium.