Team Kada don stand gidigba as champions inside U18 Girls, U19 Boys and Senior Men side for 2021 President Beach Volleyball Cup wey just finish for inside Kaduna.
Kada Emeralds beat Pro Spikers of Lokoja witi correct scores 2-0 (21-14, 21-19) to take grab gold for inside de U18 Girls event , den Goldening Spikers of Anambra kuku over take Sokoto witi 2-0 (21-15, 21-13) to take win bronze medal make e no be like say dem empty go back house.
Kada Kings con choke Pro Spikers of Lokoja as dem come back from unda to take win gold medal for inside U19 Boys category. Kada Kings win de game 2-1 (19-21, 21-8, 15-10) for de front of dia home fans, Zamfara come numba position afta dem clear Borno doubt 2-0 (21-12, 21-12).
Kada Kings fire NSCDC 2-1 (21-19, 21-23, 15-13) to take become champions inside de Senior men category.
Na so de two boys Jasper Peter and Austin Uche (Kada Kings) show say dem be baba for dem game as dem change am for popular Godwin Shekerau and Andrew Sunday of NSCDC.
Kada Kings fess win de fess set 21-19 afta dem drag like bubble chewin gum witi NSCDC na so secon set dem go loose am as NSCDC show dem small pepper as e end 21-23 bcos yeye yeye mistake dem come de do. Ogas at top NSCDC still con de lead inside numba Tiri set, na so Kada Kings jus come from back to take come win de numba tiri set by 15-13, chaii Naso place scatter witi jollification.
Na so Jasper Peter wey de play for Kada Kings come tell tori pipu talk say , as dem win dis President Cup na correct booster for young players for inside we country Naija .
As belle sweet Peter reach e come de thank de Chairman Caretaker Committee of Nigeria Volleyball Federation, Oga Engineer Musa Nimrod as en take beliv say dia boys get follow come ability for dia game.
Nigeria Immigration Service con beat Nigeria Customs Service 2-0 (21-14, 21-17) to take finish as numba tiri inside men category.
For inside senior women category, Nigeria Customs Service still hold dia title for body as dem run Hasso Queens street for game wey 2-0 (21-14, 21-17) for front of more dan 500 pipu wey come watch de game . De secon team of Nigeria Customs Service
Clear Oga at de top dem NSCDC 2-0 (21-16, 21-12) to take win numba tiri position.